जरा सांगाल का?

दुःखांतील सृजनशील नागडेपणानंतर
सुखात गुंडाळलेली अनुभवशून्यता
भोगून पांगळे झालेल्यांनो
कुठल्या कुबड्या वापरता
जरा सांगाल का?
समाधी शिकवणारा कुणी
भेटला नाही ह्याची खंत नाही
समाधी म्हणून प्रत्येकाची
आत्महत्या पूजनीयही होत नाही
तुम्ही चालता आहात
तिरस्काराने थुंकावे तशी
आता माझीही पाउले त्याच रस्त्यावर
गुळगुळीतपणाची थोबाडीत खाऊन
कोडगे झालेले सारे शब्द कुठे डागू?
एखादा बामियान बुद्ध ठिकरला म्हणजे?
आत्मदिमाखाचे सांडपाणी संपलेल्यांनो
तुमचे हौद कुणापुढे धरता
जरा सांगाल का?